మహారాష్ట్ర లో పోటెత్తుతున్న బెల్లం రాబడులు

 

20-02-2022

దేశంలో రికార్డు స్థాయికి చేరిన చెరకు ఉత్పత్తి, సానుకూలంగా పరిణమించిన వాతావరణంతో పాటు పెరుగుతున్న పంచదార ఉత్పత్తికి అనుగుణంగా అమ్మకాలు కొరవడినందున పంచదార మిల్లర్లు ఆవేదన చెందుతున్నారు. కర్ణాటక, మహారాష్ట్ర, మధ్య ప్రదేశ్, ఛత్తీస్గఢ్ చెరకు రైతులు బెల్లం తయారీ ప్రక్రియ శరవేగంతో చేపడుతున్నారు.

ఆంధ్రప్రదేశ్లో బెల్లం రాబడులు గత వారం 100 వాహనాలు, కర్ణాటకలో 150 వాహనాలు, మహారాష్ట్రలో 125 వాహనాలు మరియు మధ్య ప్రదేశ్, ఛత్తీస్గఢ్ కలిసి 250 వాహనాల సరుకు రాబడి అవుతున్నదని వ్యాపారులు తెలిపారు. కొరవడిన కిరాణా వ్యాపారులు కొనుగోళ్లు, వచ్చే వారం రాబడులు మరింత విజృంభించే అంచనాతో దేశవ్యాప్తంగా ధరలు కుదేలవుతున్నాయి. 

చెరకు ఉత్పత్తి సమృద్ధిగా రాణిస్తున్నందున రైతులలో ఆందోళన వ్యక్తమవుతున్నది. రాబోయే సీజన్ కోసం చెరకు స్థానంలో ఇతర పంటల సేద్యం చేపట్టేందుకు భూములు సిద్ధం చేస్తున్నారు. కావున వచ్చే సీజన్లో చెరకు ఉత్పత్తి తగ్గి బెల్లం భవిష్యత్తు ఉజ్జ్వలంగా ఉండగలదని వ్యాపారులు భావిస్తున్నారు. గత వారం ఉత్పాదక కేంద్రాల వద్ద బెల్లం రాబడులు ఒత్తిడికి గురైనందున ధర ప్రతి క్వింటాలుకు రూ. 125–150 పతనమైంది. అయితే, ఉత్తరప్రదేశ్లోని శీతల గిడ్డంగులలో గత ఏడాదితో పోలిస్తే తగ్గిన బెల్లం నిల్వలు మరియు ఈశాన్య భారతో పాటు పంజాబ్, హర్యాణా, రాజస్తాన్, గుజరాత్లో తగ్గిన నిల్వలు మరియు పెరిగిన వ్యాపారుల కొనుగోళ్లతో ధరలు దిగిరావడంలేదు.

 ఉత్తరప్రదేశ్లోని ముజఫర్ నగర్ లోని శీతల గిడ్డంగులలో ఫిబ్రవరి 14 నాటికి బెల్లం నిల్వలు గత ఏడాది ఇదే వ్యవధితో పోలిస్తే 8,12,005 బస్తాల నుండి 3,62,262 బస్తాలు తగ్గి 4,40,943 బస్తాలకు పరిమితమయ్యాయి. ఇందులో చాకూబెల్లం గత ఏడాది ఇదే వ్యవధితో పోలిస్తే 4,01,957 బస్తాల నుండి తగ్గి 2,55,971 బస్తాలు, రసకట్ 42,198 బస్తాల నుండి 11,168 బస్తాలు, కురుపా 10,565 బస్తాల నుండి 4453 బస్తాలు, చదరాలు 27,966 బస్తాల నుండి 19,951 బస్తాలు, రాబిటన్ 1,54,254 బస్తాల నుండి 1,14,538 బస్తాలు, పాప్ 86,265 బస్తాల సరుకు నిల్వలు అందుబాటులో ఉన్నాయి. 

ముజఫర్ నగర్ లో గత వారం 30-35 వేల బస్తాల రాబడిపై ప్రతి 40 కిలోలు చాకూ బెల్లం రూ. 1120-1190, కురుపా రూ. 1050-1065, లడ్డు రూ.1140-1151, రస్కెట్ 990-1025, పౌడర్ బెల్లం రూ. 1210-1221 మరియు 

హాపూర్లో 60-65 వాహనాలు దిమ్మల బెల్లం రూ. 1000-1050 లోకల్ లూజ్ ధరతో వ్యాపారమైంది. 

మధ్య ప్రదేశ్లోని కరేలిలో గత సోమవారం నుండి శుక్రవారం వరకు 60-65 వాహనాల సరుకు రాబడిపై రూ. 2600-2700, నర్సింగ్పూర్లో గురువారం 30-35 వాహనాల సరుకు రాబడిపై ఎరుపు-సురభి మిక్స్ రూ. 2600–2650 మరియు 

మహారాష్ట్రలోని లాతూర్లో గత వారం 30-35 వేల దిమ్మల బెల్లం రాబడి కాగా, సురభి రకం రూ. 2750-2800, ఎరుపు- నలుపు మిక్స్ రూ.2500-2550,

 సోలాపూర్లో 18-20 వేల దిమ్మలు సురభి రకం రూ. 2700-2800, ఎరుపు-నలుపు మిక్స్ రూ.2550, సాంగ్లీలో 15-16 వేల దిమ్మల కొత్త బెల్లం రాబడిపై సురభి రకం రూ. 3400-3600, గుజరాత్ రకం రూ. 3350-3500, ముంబై రకం రూ. 3500-3650 ప్రతి క్వింటాలు ధరతో వ్యాపారమైంది.

 కర్నాటకలోని మాండ్యాలో గత వారం 70-75 వాహనాల సరుకు రాబడిపై ఎరుపు రకం రూ. 2650, సింగల్ ఫిల్టర్ రూ. 2750, డబుల్ ఫిల్టర్ రూ. 2900, చదరాలు రూ. 3100-3150, మహాలింగపూర్లో 8-10 వాహనాలు సురభి, తెలుపు గుజరాత్ రకం రూ. 3400 - 3450, ఆరకిలో ముక్కలు రూ.3500, శిమోగాలో 18-20 వాహనాలు దేశీ బెల్లం రూ.3400-3450 ప్రతి. క్వింటాలు ధరతో వ్యాపారమైంది.

ఆంధ్రప్రదేశ్ లోని అనకాపల్లిలో గత వారం 65-70 వేల దిమ్మల కొత్త బెల్లం గులాబీ రకం నాణ్యమైన సరుకు రూ. 3100-3150, మీడియం రూ. 2850-2900, నలుపు రూ. 2500-2520 మరియు చిత్తూరులో 35-40 వాహనాల ఎసి సరుకు రాబడిపై సురభి రకం రూ. 3400-3500, సూపర్-ఫైన్ రూ. 3900-4000, సాట్నా రకం రూ. 3100-3200, నలుపు రూ.2650-2700 ధరతో వ్యాపారమైంది. 

తమిళనాడులోని సేలం మార్కెట్లో గత వారం 7-8 వేల బస్తాల బెల్లం రాబడిపై తెలుపు 30 కిలోలు రకం రూ. 1200-1230, సురభి రకం సరుకు రూ. 1180-1200, ఎరుపు రకం రూ. 1170-1190, పిలకలపాలయంలో 3-4 వేల బస్తాలు తెలుపు రకం రూ. 1170-1200, సురభి రకం రూ. 1150-1170, ఎరుపు రూ. 11.30-1150 మరియు వెల్లూరులో 5-6 వాహనాల సరుకు రాబడిపై నాణ్యమైన సరుకు రూ. 3500, మీడియం రూ. 3200-3250, నలుపు రకం రూ. 2600 ప్రతి క్వింటాలు ధరతో వ్యాపారమైంది.