𝐌𝐘 𝐅𝐀𝐑𝐌𝐈𝐍𝐆 𝐌𝐘 𝐏𝐀𝐒𝐒𝐈𝐎𝐍

  అంతర్జాతీయ విపణిలో లెమన్ మరియు లింక్లి కందుల ధర 15-20 డాలర్ తగ్గి ప్రతి టన్ను 1040 డాలర్ సి అండ్ ఎఫ్ ప్రతిపాదించినందున ముంబైలో దిగుమతి అయిన లెమన్ కందులు కొత్త సరుకు ధర రూ. 100 వృద్ధిచెంది రూ. 8350, మొజాంబిక్ గజరి కందులు రూ. 7150-7200, మాలవి ఎర్ర కందులు రూ. 6850-6900, సూడాన్ కందులు రూ. 8600-8700 ధరతో వ్యాపారమైంది. 

   తమిళనాడు పౌరసరఫరాల శాఖ వారు గత వారం దేశీయ మరియు దిగుమతి అయిన కందులతో మిల్లింగ్ చేసిన 20 వేల టన్నుల కంది, పెసర పప్పు కొనుగోలుకు తిరిగి ఆన్లైన్ టెండర్ జారీ చేయడం మరియు వ్యవధిని మే 5 వరకు పొడిగించడంతో పాటు ఉత్పాదక కేంద్రాల వద్ద రాబడులు సన్నగిల్లడం, అంతర్జా తీయ ధరలు పెరగడం వలన గత వారం కందుల ధర రూ.200-300 బలపడింది.

   కేంద్ర ప్రభుత్వం కందిపప్పు ధరలను అదుపు చేసేందుకు చేస్తున్న కృషి మరియు అంతర్జాతీయ విపణిలో లెమన్ మరియు లింక్లి కందుల ధర 20 డాలర్ తగ్గి ప్రతి టన్ను 1020 డాలర్ సి అండ్ ఎఫ్ ప్రతిపాదించినందున ముంబైలో దిగుమతి అయిన లెమన్ కందులు కొత్త సరుకు ధర రూ. 50 తగ్గి రూ. 8000, మొజాంబిక్ గజరి కందులు రూ. 6650, మాలవి ఎర్ర కందులు రూ. 6450-6500, సూడాన్ కందులు రూ. 8250-8450 ప్రతి క్వింటాలు ధరతో వ్యాపారమైంది.

   ప్రముఖ పప్పు ధాన్యాల ఉత్పాదక ప్రాంతమైన మధ్య భారత్ లో సెప్టెంబర్-అక్టోబర్ లో ఎడతెరిపి లేకుండా కురిసిన వర్షాలతో కంది పంటకు నష్టం వాటిల్లినందున ప్రస్తుత ఖరీఫ్ సీజన్ లో కందుల ఉత్పత్తి గత ఏడాదితో పోలిస్తే 43,40 ల.ట. నుండి తగ్గి 38.90 ల.ట. రాబడి కాగలదనే అంచనా వ్యక్తమవుతున్నది. దేశంలో కందుల వార్షిక ఉత్పత్తి 43.25 ల.ట. ఉండగలదని భావిస్తున్నారు. పప్పు మిల్లులకు సకాలంలో సరుకు అందుబాటులో ఉండాలి. అందుకు భిన్నంగా స్టాకిస్టులు మరియు దిగ్గజ రైతుల అధీనంలో సరుకు నిల్వలు మగ్గుతున్నాయి. 

   ఈసారి కందుల సేద్యం తగ్గినట్లు ప్రభుత్వ వర్గాలు ధృవీకరించగా, వ్యాపారులు కూడా ఇందుకు ఏకీభవిస్తూ కందుల ఉత్పత్తి ప్రభుత్వ అంచనాతో పోలిస్తే రెట్టింపు పరిమాణం తగ్గగలదని తమ అభిప్రాయం వెల్లడించారు. ప్రభుత్వం చేపట్టనున్న కొనుగోళ్లు 25 శాతం నుండి పెంచి 40 శాతం నిర్ధారించింది. ఇలాంటి పరిస్థితులలో సరఫరా తగ్గగలదని భావిస్తున్నారు. దేశంలో తగ్గిన మొత్తం పప్పు ధాన్యాల సేద్యం మరియు పంటలకు వాటిల్లిన నష్టంతో రాబోయే సీజన్లో కందిపప్పు, పెసరపప్పు ధరలు వినియోగదారులకు చుక్కలు చూపించడం తథ్యమని చెప్పవచ్చు. ప్రస్తుత ఖరీఫ్ సీజన్ లో సెప్టెంబర్ 23 నాటికి దేశంలో పప్పు ధాన్యాల సేద్యం గత ఏడాది ఇదే వ్యవధితో పోలిస్తే 48.22 ల.హె. నుండి తగ్గి 46.04 ల.హె.కు పరిమితమైందని కేంద్ర వ్యవసాయ శాఖ విడుదల చేసిన తమ నివేదికలో పేర్కొన్నది. ఉత్పత్తి తగ్గే అంచనా వ్యక్తమవుతున్నందున డాలర్ తో పోలిస్తే బలహీనపడిన రూపాయి రూ. 81 దిగజారినందున దిగుమతి వ్యయం ఇబ్బడిముబ్బడిగా పెరిగింది.

   వ్యవసాయ మంత్రిత్వ శాఖ వారి తాజా నివేదిక ప్రకారం దేశంలో సెప్టెంబర్ 16 నాటికి కంది పంట సేద్యం గత ఏడాది ఇదే వ్యవధితో పోలిస్తే 47.95 లక్షల హెక్టార్ల నుండి తగ్గి 45.73 లక్షల హెక్టార్లకు పరిమితమైంది. తెలంగాణలో కంది పంట సేద్యం గత ఏడాది ఇదే వ్యవధితో పోలిస్తే 9,02,489 ఎక రాల నుండి తగ్గి 5,58,826 ఎకరాలకు మరియు గుజరాత్ లో 2,29,028 హెక్టార్ల నుండి తగ్గి 2,23,978 హెక్టార్లకు చేరింది. అయితే కర్ణాటకలో వర్షాల వలన పంటకు నష్టం చేకూరడంతో ఉత్పత్తి తగ్గే అవకాశం కలదు. దేశంలో కందుల లభ్యత కనీస స్థాయికి చేరింది. దిగుమతి విధానం కారణంగా మయన్మార్ లో కూడా నిల్వలు తగ్గాయి. ఆఫ్రికాలో పంట నాణ్యంగా లేనందున మిల్లర్లు సరుకు కొనుగోలుకు ముందుకు రావడం లేదు. గత వారం కందులు, పప్పు ధరలు రూ. 300-400 ప్రతి క్వింటా లుకు పెరిగాయి.

అధికారుల కథనం ప్రకారం బుధవారం ప్రధానమంత్రి నరేంద్ర మోడీ అధ్యక్షతన జరిగిన ఆర్థిక వ్యవహారాల మంత్రివర్గ సంఘం వారి సమావే శంలో ధరల మద్దతు పథకం క్రింద కందులు, మినుములు, సిరిశనగ కొనుగోళ్ల గరిష్ట పరిమితిని మొత్తం ఉత్పత్తి యొక్క 25 శాతం నుండి పెంచి 40 శాతానికి చేయడం జరిగింది. అయితే సెప్టెంబర్ 2 వరకు కంది పంట విస్తీర్ణం గత ఏడాది ఇదే వ్యవధితో పోలిస్తే 47.56 ల.హె. నుండి తగ్గి 44.86 ల.హె.కు చేరింది. 

  ప్రస్తుత పంట కాలం (2021 జూలై - 2022 జూన్) లో కందుల ఉత్పత్తి 43.50 ల.ట. నుండి స్వల్పంగా తగ్గి 43.40 ల.ట. ఉండగలదని కేంద్ర వ్యవసాయ మంత్రిత్వ శాఖ విడుదల చేసిన తమ నాల్గవ ముందస్తు అంచనాలో తమ అభిప్రాయం వెల్లడించింది. ఇదిలా ఉండగా, ప్రతికూల వాతావరణ పరిస్థితులు నెలకొన్నందున ప్రభుత్వ అంచనా కన్నా మరింత తగ్గగలదని వ్యాపారులు పేర్కొన్నారు. తద్వారా వ్యాపారులు ఇప్పటి నుండే అప్రమత్తమైనందున ధరలకు మద్దతు లభిస్తున్నది. 

 గత ఏడాది ఉత్పత్తి తగ్గడంతో దిగుమతుల తరువాత కూడా ధరలు పెరుగుతున్నాయి. రాబోవు సీజన్ కోసం విస్తీర్ణం 4.63 ల.హె. మేర తగ్గ డంతో వచ్చే ఏడాది పరిస్థితి ఎలా ఉండబోతుందో గోచరించడం లేదు. కొత్త సీజన్ లో ధర రూ. 9000 ప్రతి క్వింటాలు స్థాయిని కూడా అధిగమించగల దనే సందేహం ఉత్పన్నమౌతోంది. శనివారం వరకు మహారాష్ట్రలో కందుల ధర వృద్ధిచెంది రూ. 7500-8400 ప్రతి క్వింటాలుకు చేరింది. కొత్త సీజన్ కోసం మరో 90 రోజుల సమయం ఉంది. కావున నాణ్యమైన సరుకు ధర మరింత వృ ద్ధిచెంది రూ. 9000-9500 వరకు చేరవచ్చు.

  వ్యవసాయ మంత్రిత్వ శాఖ వారి వివరాల ప్రకారం దేశంలో కంది. పంట విస్తీర్ణం గతేడాది ఇదే వ్యవధితో పోలిస్తే 12-22 ల.హె. నుండి తగ్గి 10.57 ల.హె.లకు చేరింది. అయితే కర్ణాటకలో 3.62 లక్షల హెక్టార్లు, మహారాష్ట్రలో 4.72 ల.హె. ఉంది. కొన్ని రాష్ట్రాలలో పంట విత్తడం కొనసాగుతున్నందున విస్తీర్ణం గత ఏడాది మాదిరిగానే ఉండే అంచనా కలదు.

   వ్యవసాయ మంత్రిత్వ శాఖ వారి వివరాల ప్రకారం జూన్ 24 వరకు కూడా దేశంలో కందిపంట విస్తీర్ణం గతేడాది ఇదే వ్యవధితో పోలిస్తే 5.21 ల.హె. నుండి తగ్గి 2.35 ల.హె.లకు చేరింది. అయితే కర్ణాటకలో జూన్ 10 వరకు విస్తీర్ణం 48 వేల హెక్టార్లతో పోలిస్తే 67 వేల హెక్టార్లకు చేరిన తరువాత వర్షాభావ పరిస్థితి ఉండడంతో ధరలు పటిష్టంగా మారాయి.

  అంతర్జాతీయ మార్కెట్లో మయన్మార్ లెమన్ కందుల ధర సోమవారం నాడు 890 డాలర్లతో పోలిస్తే శనివారం వరకు 20 డాలర్లు తగ్గి 870 డాలర్లు ప్రతి టన్ను సి అండ్ ఎఫ్ ప్రతిపాదించబడింది. కాని ముంబెలో కొత్త లెమన్ కందులు రూ. 50 బలపడి రూ. 6300, అరుశరూ. 5550-5600, మొజాంబిక్, గజరి రూ. 5500, మాలవి కందులు ఎరుపు రకం రూ. 4950-5050, మరాట్వాడా రూ.5350-5400 ధరతో వ్యాపారమైంది. అయితే దేశంలోని ఇతర ఉత్పాదక రాష్ట్రాలలో పప్పుకు గిరాకీ తక్కువగా ఉన్నందున ధరలు మందకొడిగా ఉన్నాయి. 

  వేసవి సీజన్ కారణంగా పప్పు అమ్మకాలు పెరగడంలేదు. మధ్య తరగతి రైతులు తమసరుకు విక్రయిస్తున్నందున ధరలు స్థిరంగా ఉన్నాయి. జూన్ తరువాత గిరాకి వచ్చే అవకాశం ఉంది. మార్కెట్లలలో రాబడులు నామ మాత్రంగా ఉండడంతో ధరలు 8-10 శాతం పెరగవచ్చు. ఎందుకనగా దిగుమతులు పెరిగే అవకాశం ఉన్నందున మయన్మార్ వ్యాపారులు నెమ్మదిగా సరుకు విక్రయిస్తున్నారు. ముంబెలో కొత్త లెమన్ కందులు రూ.50 తగ్గి రూ.6250, అరుశ రూ. 5500-5600, మాలవి కందులు ఎరుపు రకం రూ. 4950-5000, మొజాంబిక్ తెలుపు రకం రూ.5450-5500, మట్వాడా రూ. 5350-5400 ధరతో వ్యాపారమెంది.

   కేంద్ర ప్రభుత్వం అపరాల దిగుమతి విధానాన్ని సవరిస్తూ, 31 మార్చి 2023 వరకు కందులు, మినుముల స్వేచ్ఛా దిగుమతికి అనుమతించింది. దీనితో మయన్మార్ నుండి 2 నుండి 2.50 లక్షల టన్నుల సరుకు దిగుమతి అయ్యే అవకాశం కలదు. అంతేకాకుండా ఆఫ్రికాలో ఆగస్టు 2022లో పంట కోతలు ఉండగలవు. దీనితో దేశీయ మార్కెట్లో ధరలు మందకొడిగా మారుతున్నాయి. అయితే భారత్ ద్వారా డిమాండ్ ఉన్నందున మయన్మార్ లెమన్ కందుల ధర 20 డాలర్లు పెరిగి 850 డాలర్లు ప్రతి టన్ను సి అండ్ ఎఫ్ ప్రతిపాదించబడింది. ప్రస్తుతం వేసవి సీజన్లో పప్పు వినియోగం తగ్గడంతో మిల్లుల కోసం డిమాండ్ తక్కువగా ఉంది. 

  అంతర్జాతీయ విపణిలో మయన్మార్ లెమన్ కందులు 5 డాలర్లు తగ్గి 825 డాలర్లు ప్రతి టన్ను సి అండ్ ఎఫ్ ప్రతిపాదించినందున మహారాష్ట్రలోని ముంబెల్డో కొత్త లెమన్ కందులు రూ.150 తగ్గి రూ. 6275-6300, అరుశ రూ.5500-5600, మొజాంబిక్, గజరి రూ. 5450-5500, మాలవి కందులు రూ. 4900-5000, సూడాన్ సరుకు రూ. 6500-6600, మట్వారా రూ. 5450-5500 ధరతో వ్యాపారమైంది.

  అంతర్జాతీయ మార్కెట్లో మయాన్మార్ లెమన్ కందుల ధర 10 డాలర్లు పెరిగి 820 డాలర్లు ప్రతిటన్ను ప్రతిపాదించడంతో మహారాష్ట్రలోని సోలాపూర్, లాతూరు, నాందేడ్ ప్రాంతాల కందులు చెన్నై డెలివరీ రూ. 6900-7000 మరియు గుజరాత్ బిడిఎన్-2 రకం రూ. 7000-7050 ధరతో వ్యాపారమయింది. అయితే, పప్పుకు గిరాకీ ఎక్కువగా లేదు. కూరగాయల ధరలు కూడా రోజురోజుకు పెరుగుతున్నాయి. దేశంలో ఉత్పత్తి తగ్గడంతో భవిష్యత్తులో మరింత పెరుగుదలకు అవకాశం కలదు.

 భారతదేశంలో తగ్గిన కందుల ఉత్పత్తితో కందుల ధరలు స్థిరపడ్డాయి. అంతర్జాతీయ విపణిలో మయన్మార్ లెమన్ కందులు 20 డాలర్లు పెరిగి 810 డాలర్లు ప్రతి టన్ను సి అండ్ ఎఫ్ ప్రతిపాదించినందున మహారాష్ట్రలోని సోలాపూర్, లాతూర్, నాందేడ్ ప్రాంతాలలో నాణ్యమైన కందులు చెన్నై డెలివరి రూ. 100 వృద్ధి చెంది రూ. 6950-7000, గుజరాత్ ప్రాంతం బిడిఎన్-2 కందులు రూ. 7000, ఆంధ్ర ప్రాంతం కందులు రూ. 7100 ప్రతి క్వింటాలు ధరతో వ్యాపారమైంది. 

  20-02-2022 అంతర్జాతీయ విపణిలో మయన్మార్ లెమన్ కందులు 30 డాలర్లు తగ్గి 790 డాలర్లు ప్రతి టన్ను సి అండ్ ఎఫ్ ప్రతిపాదించినందున పప్పు కోసం గిరాకీ కొరవడినందున కందుల ధరలకు కళ్లెం పడింది. ప్రస్తుత ఖరీఫ్, రబీ పంట కాలం (2021 జూలై - 2022 జూన్) లో కందుల ఉత్పత్తి గత 1 ఏడాదితో పోలిస్తే 43.20 ల.ట. నుండి తగ్గి 40 ల.ట.కు పరిమితం కాగలదని కేంద్ర వ్యవసాయ శాఖ విడుదల చేసిన రెండవ ముందస్తు అంచనాలో పేర్కొన్నది. అతివృష్టితో పంటకు నష్టం వాటిల్లినందున ఉత్పత్తి 30-32 ల.ట. అధిగమించే అవకాశం లేదని వ్యాపారులు పేర్కొన్నారు.

  15-02-2022 దేశంలో కందుల ఉత్పత్తి తగ్గినందున భారీ దిగుమతులకు అవకాశం ఉండే అంచనాతో కనీస మద్దతు ధర కంటే తక్కువ ధరతో కొత్త సీజన్ ప్రారంభమైంది. అయితే, నాణ్యమైన సరుకు కొరత ఏర్పడినందున మరియు విదేశాలలో ధరలు ఇనుమడించే అంచనాతో స్టాకిస్టులు అప్రమత్తమయ్యారు. ఎందుకనగా, భారత్లో అపరాల ఉత్పత్తి 10 ల.ట. కూడా ఉండకపోగా దిగుమతులు 4 ల.ట.కు ప్రభుత్వం పరిమితం చేసింది. అంతేకాకుండా కొత్త సీజన్ ప్రారంభ సమయంలో 2 ల.ట. నిల్వలు అందుబాటులో ఉన్నప్పటికీ సీజన్ చివరినాటికి 2 ల.ట. కొరత ఏర్పడింది. దీనిని పరిశీలిస్తున్న వ్యాపారులు భవిష్యత్తులో కందుల ధర రూ. 7500 తాకడం తథ్యమని అభిప్రాయపడుతున్నారు. 

02-02-2022  మహారాష్ట్ర వ్యవసాయ డెరైక్టరేట్ వారి మొదటి ముందస్తు అంచనా ప్రకారం 2021-22 సీజన్లో రాష్ట్రంలో కందుల ఉత్పత్తి ముందు ఏడాదితో పోలిస్తే 14.50 లక్షల టన్నుల నుండి 25.25 శాతం తగ్గి 10.84 ల.ట., గుజరాత్లో ఉత్పత్తి 2.72 ల.టన్నులు ఉండే అంచనా కలదు. ఇదే విధంగా కర్ణాటకలో ఉత్పత్తి 12.38 ల.ట. నుండి 16.80 శాతం తగ్గి 10.30 ల.టన్నులకు చేరే అంచనా కలదు. కొత్త సీజన్ ప్రారంభం కావడంతో పాటు ధరలు పెరిగాయి.